Bolada allergiya: nimaga ekanligini qanday aniqlash mumkin?

Agar kichkintoyning terisida to‘satdan toshma paydo bo‘lsa, u aksira yoki yo‘tala boshlasa - bu ko‘plab infeksiya turlaridan birining belgilari bo‘lishi mumkin. Shuningdek, bunday alomatlar ortida bolalar, ayniqsa maktabgacha yoshdagilarning sog‘ligida eng ko‘p uchraydigan muammolardan biri - allergiya yashiringan bo‘lishi ham mumkin. Keling, uni boshqa kasalliklardan qanday ajratish, allergik reaksiyani nima keltirib chiqarganini qanday aniqlash va bolaga qanday yordam ko‘rsatish mumkinligini ko‘rib chiqamiz.

Allergiya - immunitet tizimining o‘ziga xos "xato"si bo‘lib, uning natijasida organizm uchun zararsiz moddalar xavf sifatida qabul qilinadi. Odatda, himoya kuchlari xavfga qarshi kurashishi va uni zararsizlantirishi kerak. Ammo bunday nosozlik yuz berganda, ko‘pchilik uchun xavfsiz bo‘lgan modda allergenga aylanib, organizmning noadekvat reaksiyasini keltirib chiqaradi.

Allergen bilan aloqaga kirishganda maxsus oqsillar - immunoglobulinlar yoki antitanachalar ishlab chiqarila boshlaydi. Keyingi uchrashuvda ular tufayli immunitet "dushman"ni tanib oladi va begona agentni zararsizlantirish uchun ma’lum bir kimyoviy reaksiyani ishga tushiradi. Biroq, bu kurash "shamol tegirmonlari" bilan (behuda) olib borilgani sababli, organizm aslida dushmanga emas, balki do‘stga hujum qiladi. Natijada yallig‘lanish rivojlanadi, bu esa turli xil alomatlar bilan namoyon bo‘lishi mumkin: teridagi toshmalardan tortib to og‘ir tizimli buzilishlargacha.

Bolalardagi allergiyaning sabablari

Nima sababdan bir kishida ma’lum bir moddaga nisbatan allergik reaksiya rivojlanishi, boshqa kishi uchun esa ayni shu modda xavfsiz yoki hatto foydali bo‘lishi hanuzgacha aniq ma’lum emas. Ammo bolada allergiya paydo bo‘lish ehtimolini oshiradigan omillar mavjud. Bular:

• Irsiyat. Agar ona yoki otada allergiya bo‘lsa, chaqaloqda uning rivojlanish ehtimoli ancha yuqori bo‘ladi. Bolaga uning immun tizimi muayyan moddalarga nisbatan o‘ta sezuvchan bo‘lishiga olib keladigan xususiyatlar o‘tishi mumkin.
• Ekologiya. Shaharlardagi smog, maishiy kimyoviy moddalar, oziq-ovqatdagi sun’iy qo‘shimchalar - bularning barchasi bola organizmiga ortiqcha yuk bo‘ladi. Bola nafas olayotgan havodagi zararli moddalar nafas yo‘llarida yallig‘lanishni keltirib chiqarishi va allergik reaksiyalarni qo‘zg‘atishi mumkin.
• Erta yoshdagi infeksiyalar. Erta virusli va bakterial kasalliklar immunitetni zaiflashtirishi mumkin. Ba’zan bu holat immunitet tizimining "qayta sozlanishi"ga olib keladi va u zararsiz moddalarga xavf sifatida munosabat bildira boshlaydi.

Lekin bu sabablarning hech biri alohida holda ham, barchasi birgalikda bo‘lgan holda ham, bolada allergik reaksiya paydo bo‘lishiga yuz foiz ehtimollik bilan sabab bo‘la olmaydi. Va aksincha, ba’zida kasallik uchun hech qanday aniq shart-sharoitlar bo‘lmasa-da, u baribir yuzaga kelishi mumkin.

Asosiy allergenlar

Bola organizmi turli xil, asosan oqsil tabiatli moddalarga allergik reaksiya ko‘rsatishi mumkin. Allergenlarning asosiy guruhlari:

1. Oziq-ovqat allergenlari. Bular quyidagi oziq-ovqat mahsulotlari: sut, tuxum, yong‘oq, baliq, qulupnay va hatto shokolad.
2. Maishiy allergenlar. Ular gilam, yostiq, ko‘rpa, mebel qoplamalari, o‘yinchoqlar va boshqa kundalik buyumlarda yashovchi uy changi kanalaklari bilan bog‘liq.
3. Gul changi. O‘simliklar gullaydigan palladagi chang tarkibidagi allergen.
4. Epidermal allergenlar. Asosan hayvonlarning juni hisoblanadi, ammo teri qipiqlari, (jumladan inson terisiniki) ham bo‘lishi mumkin.
5. Zamburug‘ allergenlari. Mog‘or, achitqi va boshqa zamburug‘ turlari allergik reaksiyalarning yuzaga kelishiga sabab bo‘lishi mumkin.
6. Dori-darmonlar. Oddiy yo‘tal yoki isitmaga qarshi sirop yengillashtirishning o‘rniga yangi muammolarni keltirib chiqarishi mumkin. Ota-onalar xavfli modda bilan qayta aloqaga tushmaslik uchun dorilarga bo‘lgan barcha shubhali reaksiyalar haqida shifokorga xabar berishlari zarur.

Allergenlar bola organizmiga qanday tushishi mumkin?

• Ovqat bilan. Kichik bolalarda oziq-ovqat allergiyasi immunitet tizimining yetilmaganligi bilan bog‘liq bo‘lishi mumkin va ko‘pincha yosh ulg‘ayishi bilan o‘tib ketadi. Ammo yong‘oq va baliq kabi ba’zi mahsulotlarga allergiya umr bo‘yi saqlanib qolishi mumkin.
• Nafas yo‘llari orqali: gul changi, chang, so‘lak zarrachalari, hayvon terisi (o‘ylaganimizdek faqat junning o‘zi emas). O‘simlik changlari mavsumiy allergiya - pollinozni keltirib chiqaradi va u gullash davrida kuchayadi. Tarkibida kanalaklar bo‘ladigan uy changi yoki hayvonlarning ajratmalari yil davomida allergik alomatlarni yuzaga keltirishi mumkin.
• Teri va shilliq pardalar orqali. Kremlar, kir yuvish kukuni, metallar - teriga teginadigan hamma narsa. Ko‘pincha allergiya kosmetikadagi xushbo‘ylantirgichlarga yoki maishiy kimyoviy mahsulotlardagi turli hid beruvchi moddalarga nisbatan yuzaga keladi. Shuning uchun bolalar terisini parvarish qilishda gipoallergen vositalarni tanlash, bolalar kiyimlarini esa 0+ belgisi bo‘lgan maxsus kukunlar bilan yuvish maqsadga muvofiqdir.
• Hasharotlar chaqishi. Hatto chivin chaqishiga ham allergiya bo‘lishi mumkin. Undan ham ko‘proq asalarilar, arilar va boshqa hasharotlarning chaqishi allergiyani keltirib chiqaradi. Buning natijasida kuchli shish paydo bo‘lishi, og‘ir hollarda esa hayot uchun xavfli bo‘lgan anafilaktik shok yuz berishi mumkin.

Allergiyaning makkorligi shundaki, uning alomatlarini boshqa kasalliklarning belgilari bilan osongina adashtirib yuborish mumkin. Bundan tashqari, reaksiya har doim ham tezda sezilmaydi va yaqqol ko‘rinmaydi. Misol uchun, chaqaloq terisiga yangi krem surilishi yoki kiyimini yuvishda yangi kir yuvish kukuni ishlatilgandan so‘ng paydo bo‘lgan kichik toshmani boshqa teri kasalliklari, masalan, terining kuchli terlashi va terning sekin bug‘lanishi oqibatida rivojlanadigan kasallik yoki bichilish deb o‘ylash mumkin. Faqatgina muammoni bartaraf etishga urinishlar natija bermagandan keyin, bu holat allergik reaksiya ekanligidan shubhalanish mumkin.

Bu alomatlarning (nisbatan xavfsizdan tortib hayot uchun xavfli bo‘lgan turlarigacha) xilma-xilligi ham insonni chalg‘itishi mumkin. Ota-onalar hushyor bo‘lish uchun bolada allergiya qanday namoyon bo‘lishi mumkinligini imkon qadar yaxshiroq o‘rganib chiqishlari lozim.

Allergik reaksiya belgilari

Teridagi allergik reaksiya belgilari. Teridagi toshmalar, qichishish, teri qizarishi, quruqlashishi va shishishi. Masalan, ko‘pincha kontakt dermatit uchraydi, u qichishish, og‘riq, qizarish, pufakchalar paydo bo‘lishi yoki namlanish bilan namoyon bo‘ladi. Jarayon qanchalik uzoq davom etsa, uning belgilari shunchalik xilma-xil bo‘lib, sababini aniqlash murakkablashadi.

Nafas olish yo‘llari bilan bog‘liq alomatlar. Aksirish, tumov, burun bitishi, yo‘tal va nafas qisilishi nafas olish yo‘llari allergiyasidan darak berishi mumkin. Masalan, pollinoz (mavsumiy allergiya) tumov, burun qichishi va ko‘zdan yosh oqishi bilan kechadi. Allergiyaning og‘ir shakllarida astma rivojlanishi mumkin, bu esa nafas siqilishi xurujlari va xushtaksimon nafas olish bilan namoyon bo‘ladi.

Oshqozon-ichak tizimi reaksiyalari. Belgilari qorin og‘rig‘i, qabziyat, ich ketishi, qayt qilish va og‘iz atrofida toshma chiqishini o‘z ichiga oladi. Ba’zida bunday reaksiyalar allergen, masalan, yong‘oq yoki dengiz mahsulotlari iste’mol qilingandan keyin darhol yuzaga chiqadi. Sigir suti oqsillariga allergiyasi bor chaqaloqlarda qorinda sanchiq, tez-tez qusish, ich qotishi yoki axlatda qon kuzatilishi mumkin.

Ko‘z bilan bog‘liq alomatlar. Chang yoki gul changiga aloqador respirator shakldagi yoki kontakt allergiyada ko‘zlarning qizarishi, yoshlanishi va qichishi yuzaga keladi. Bunday belgilar qovoqlarning shishishi va yorug‘likdan qo‘rqish bilan birga kuzatilishi mumkin, bu ayniqsa bahor va yoz fasllarida yaqqol seziladi.

Anafilaktik shok - kam uchraydigan, ammo xavfli holat bo‘lib, zudlik bilan tibbiy yordam ko‘rsatilishini talab etadi. Uning belgilari qon bosimining keskin tushib ketishi, yurak urishining izdan chiqishi va hushdan ketishni o‘z ichiga oladi. Ko‘pincha anafilaksiya hasharotlar chaqishi, ayrim dori vositalarini qabul qilish yoki xavfli oziq-ovqat mahsulotlarini iste’mol qilish oqibatida yuzaga keladi.

Allergiyani boshqa kasalliklardan qanday farqlash mumkin

Allergiya belgilari shamollash, yuqumli kasalliklar yoki boshqa holatlarga o‘xshash bo‘lsa-da, muammoning asl tabiatini aniqlashda ba’zi xususiyatlar yordam beradi, jumladan:

• Tana haroratining ko‘tarilmasligi. Infeksiyalardan farqli o‘laroq, allergiya odatda isitma bilan kechmaydi. Agar bolada aksirish, burun oqishi yoki yo‘tal bo‘lsa-yu, harorati ko‘tarilmagan bo‘lsa, bu allergiyaga aloqador bo‘lishi mumkin. Biroq, ayrim hollarda organizm uchun stress tufayli yuzaga kelgan allergik reaksiyalar subfebril harorat bilan kuzatilishi mumkin - ya’ni tana harorati biroz, masalan 37,5 °C gacha ko‘tarilishi kuzatiladi.
• Alomatlarning davomiyligi. Allergiyada burun oqishi, yo‘tal, ko‘z qichishishi, allergen bilan kontakt davom etsa, haftalab, hatto oylab davom etishi mumkin. Shamollash va virusli kasalliklar uchun qisqa muddat - bir necha kundan ikki haftagacha davom etishi xarakterlidir. Agar bolada shamollashni standart davolashda ham yaxshilanish bo‘lmasa, bu allergiya haqida o‘ylashga sabab bo‘ladi. Masalan, ma’lum mavsumlarda kuchayadigan uzoq muddatli tumov ko‘pincha o‘simlik changlari bilan bog‘liq.
• Tashqi omillar bilan aloqadorlik. Allergiya odatda gullayotgan o‘simliklar, muayyan oziq-ovqat mahsulotlarini iste’mol qilish yoki pardoz vositalaridan foydalanish kabi o‘ziga xos qo‘zg‘atuvchilarga javoban yuzaga keladi. Agar belgilar, masalan, faqat yilning ma’lum bir faslida yoki hayvonlar bilan muloqotdan so‘ng namoyon bo‘lsa, bu allergik reaksiyaning xarakterli xususiyatidir.
• Toshmalarning turi va davomiyligi. Allergik toshmalar ko‘pincha qichishish bilan kuzatiladi va allergen bilan aloqadan so‘ng yuzaga chiqadi. Masalan, eshakem qo‘zg‘atuvchi ta’sir etgandan keyin bir necha daqiqa yoki soat ichida yuzaga keladi va xarakterli qizil dog‘lar paydo bo‘lib, ular bir-biriga qo‘shilib ketadi. Yuqumli (infeksion) toshmalar esa (masalan, qizamiq yoki suvchechakda) bosqichma-bosqich rivojlanadi va isitma, holsizlik kabi kasallikning boshqa alomatlari bilan birga namoyon bo‘ladi.

Bolaning allergiyasi bor-yo‘qligini qachon tekshirtirish kerak?

Allergiyani erta aniqlash asoratlarning oldini olish va davolashni o‘z vaqtida boshlash imkonini beradi. Bolangizda quyidagi belgilarni ko‘rsangiz, shifokorga murojaat qilishingiz lozim:

✓ Aniq sabablarsiz tez-tez takrorlanadigan belgilar. Shamollash kasalligi yoki bemorlar bilan aloqada bo‘lmasdan paydo bo‘ladigan toshma, burun oqishi yoki yo‘tal allergiyadan darak berishi mumkin. Masalan, davolab bo‘lmaydigan uzoq davom etuvchi tumov ko‘pincha chang yoki gul changi kabi nafas olish orqali kiradigan allergenlar tufayli yuzaga keladi. Ota-onalar bunday holatlarning muntazamligiga va ularning ma’lum sharoitlar bilan bog‘liqligiga e’tibor qaratishlari lozim.

✓ Alomatlar ma’lum vaziyatlarda kuchayadi. Agar yo‘tal, qichishish yoki burun oqishi uy tozalash yoki hayvonlar bilan muloqotdan so‘ng, tabiat qo‘ynida bo‘lgandan keyin yoki ayrim oziq-ovqat mahsulotlarini iste’mol qilgach kuchaysa, bu muhim belgidir. Bunday hollarda allergen qo‘zg‘atuvchi aniq bo‘ladi va shifokorga murojaat qilish juda zarur.

✓ Oziq-ovqat bilan bog‘liq alomatlar. Agar bola sut, tuxum yoki baliq kabi ayrim mahsulotlarni iste’mol qilgandan so‘ng unda toshma, shishlar yoki oshqozon-ichak traktining buzilishlari kuzatilsa, bu oziq-ovqat allergiyasining belgisi bo‘lishi mumkin. Shuningdek, gul changi va ba’zi mevalar o‘rtasidagi o‘zaro ta’sirlar ehtimolini ham istisno etish lozim.

Bundan tashqari, bolani allergiyaga tekshirishning yana bir sababi irsiy moyillik bo‘lishi mumkin. Ota-onasi yoki yaqin qarindoshlarida allergiya yoki astma mavjud bo‘lsa, chaqaloqda allergiya xavfi ortadi. Hatto alomatlar bo‘lmagan taqdirda ham, xavflarni baholash va profilaktika bo‘yicha tavsiyalar olish uchun shifokorga murojaat qilishingiz, masalan, qo‘shimcha ovqat kiritish yoki potensial allergenlar bilan kontaktni kamaytirish haqida maslahat olishingiz mumkin.

Albatta, shifokorga murojaat qilish lozim. Faqatgina shifokor tekshiruv belgilashi va tashxis qo‘yishi mumkin. Shifokor bilan muloqotni yengillashtirish va allergenni aniqlash jarayonini osonlashtirish uchun shifokor beradigan savollarga oldindan tayyorlanib oling.

Ota-onaning vazifasi - kichkintoyning ahvoli haqida, uni nima va qaysi vaziyatlarda bezovta qilayotgani to‘g‘risida shifokorga iloji boricha to‘liq va aniq ma’lumot berishdir.

Tashxis qo‘yishga yordam beradigan imkon qadar ko‘proq ma’lumotni to‘plashga va qayd etishga harakat qiling.

Alomatlarni kuzatib borish

E’tibor qaratish lozim bo‘lgan birinchi narsa - bu takrorlanuvchi yoki turg‘un alomatlardir. Ularning qachon va qancha vaqt davomida namoyon bo‘lishini qayd etish muhim. Misol uchun, agar bolada bahorda har safar bog‘da sayr qilgandan so‘ng tumov boshlansa, bu gul changi bilan bog‘liq bo‘lishi ehtimoli bor.

Shuningdek, alomatlarning intensivligini ham e’tiborga olish lozim. Allergiya ko‘pincha qichishish bilan kechadi, bu esa bolaning uyqusiga xalal beradi yoki uni asabiylashtirib qo‘yadi. Agar alomatlar ma’lum sharoitlarda - ovqat iste’mol qilgandan so‘ng, hayvonlar bilan muloqotda bo‘lgach yoki pardoz-andoz vositalarini ishlatgandan keyin kuchaysa, bu allergenni aniqlashning kaliti hisoblanadi.

Bunday qonuniyatlarni kuzatib borish muammoning asosiy sababini anglash uchun muhim ahamiyatga ega.

Ovqatlanish va atrof-muhitni kuzatish kundaligini yuritish

Bolaning ahvolini qayd etib borish ortiqcha kuch va vaqt sarflashdek tuyulishi, zarur bo‘lgan barcha ma’lumotlar shundoq ham xotirada saqlanib qoladi, deb o‘ylashingiz mumkin. Lekin unday emas. Agar ularni o‘z vaqtida qayd etib qo‘ysangiz, qancha muhim tafsilotlarni aniqlash mumkinligiga hayron qolasiz.

Kundalik yuritish - bu alomatlarni muayyan omillar bilan bog‘lashga yordam beradigan foydali vositadir. Kundalikda quyidagilarni qayd etish kerak:

• вola nima yeyapti,
• nima va kim bilan muloqotda bo‘lmoqda,
• natijada qanday belgilar paydo bo‘lmoqda.

Masalan, sut mahsulotlari yoki yong‘oq iste’mol qilingandan bir soat o‘tgach toshma paydo bo‘lsa, bu oziq-ovqat allergiyasi bo‘lishi mumkin. Batafsil qaydlar shifokorga reaksiya sabablarini aniqlash va keyingi tekshiruvlarni tayinlashda yordam beradi.

Ovqatlanishdan tashqari, atrof-muhit omillarini qayd etish ham muhim: yilning ma’lum faslida ko‘chaga chiqish, hayvonlar bilan muloqot, yangi pardoz vositalari yoki yuvish moddalaridan foydalanish kabi. Ishlatiladigan maishiy kimyoviy va pardoz vositalarining to‘liq nomlarini yozib oling, ularning o‘ramlarini suratga oling. Masalan, agar tumov uyda paydo bo‘lsa, bu uydagi allergenlar - chang, hayvon juni yoki ularning ozuqasi bilan bog‘liq bo‘lishi mumkin. Bunday qaydlarni tahlil qilish allergenni tezroq aniqlash va u bilan aloqani minimallashtirishga yordam beradi.

Ota-onalarning sinchkovligi va batafsil qaydlari allergiyani aniq tashxislash va davolashdagi dastlabki qadam hisoblanadi.

Davolash usuli ko‘p jihatdan bolada allergik reaksiyani nima keltirib chiqarayotganiga bog‘liq bo‘ladi. Shu sababli, bu allergenni aniq aniqlash juda muhim. Uni topish uchun turli usullar qo‘llaniladi: tibbiy sinovlardan tortib ovqatlanish ratsionini o‘zgartirishgacha. Yondashuv bolaning yoshi, reaksiyaning ehtimoliy sabablari va alomatlarini inobatga olgan holda har bir holatda alohida tanlanadi.

Allergiyani aniqlash (tashxislash) usullari

Allergenni aniqlash yo‘li murakkab va mashaqqatli kechadi.

Eliminatsion parhez

Ovqatlanish ratsionidagi o‘zgarishlar nafaqat davolash usuli, balki tashxis qo‘yish vositasi ham bo‘lishi mumkin. Agar allergiyaning oziq-ovqat bilan bog‘liqligiga shubha tug‘ilsa, bolaning ratsionidan ayrim mahsulotlarni chiqarib tashlash usuli qo‘llaniladi. Kamida ikki-to‘rt hafta davomida ratsiondan sut, tuxum yoki baliq kabi bir yoki bir nechta ehtimoliy allergenlar olib tashlanadi. Ota-onalar shu muddat mobaynida bolaning ahvolini kuzatib borib, uning holatida o‘zgarishlar bor-yo‘qligini qayd etadilar.

Uning ahvoli yaxshilangan taqdirda, ovqatlanishdagi cheklov saqlanib qoladi va davolash vositasiga aylanadi.

Shuni hisobga olish kerakki, bu yondashuv ehtiyotkorlikni talab qiladi, ayniqsa, ovqatlanishi muvozanatli bo‘lishi kerak bo‘lgan yosh bolalar haqida gap ketganda. Ayrim oziq-ovqat mahsulotlarini uzoq vaqt davomida iste’mol qilmaslik muhim ozuqa moddalarining yetishmasligiga olib kelishi mumkin. Shu sababli, eliminatsion parhez shifokor nazorati ostida o‘tkazilishi kerak, bu esa istisno qilingan mahsulotlarni to‘g‘ri almashtirish va bolaning sog‘lig‘iga salbiy ta’sir ko‘rsatmaslikka yordam beradi.

Allergenlarni aniqlash uchun tekshiruvlar va tahlillar

Afsuski, hozirga qadar bolada allergik reaksiya aynan nimaga rivojlanayotganini to‘liq aniqlash imkonini beradigan yagona usul mavjud emas. Shu bois, allergiyani tashxislashda qo‘llanilishi mumkin bo‘lgan ayrim usullarni sanab o‘tamiz:

Teri sinamalari va prik-testlar

Bu usullar eng keng tarqalgan va ma’lumot beruvchi usullar hisoblanadi. Teriga, ko‘pincha bilak yoki orqaga, turli xil allergenlarning mikroskopik dozalari qo‘llaniladi. Buning uchun allergen eritmalarining tomchilaridan foydalaniladi va ular skarifikatsiya (tirnash) yordamida yoki teri ichiga yuboriladi. Reaksiya 15-20 daqiqadan so‘ng kuzatiladi: agar qizarish yoki shish paydo bo‘lsa, bu ma’lum bir moddaga sezuvchanlik borligidan dalolat beradi. Usul yetarlicha xavfsiz, ammo kuchli allergik reaksiya kabi asoratlarning oldini olish uchun tibbiy muassasa sharoitida bajarilishi lozim. Teri sinamalari 3-5 yoshgacha bo‘lgan bolalarda yoki allergiya kuchaygan paytda o‘tkazilmaydi.

Immunoglobulin Ye (IgE) aniqlash uchun qon tahlili

Qonda umumiy IgE va allergik reaksiyalar paytida ko‘tariluvchi E sinfiga mansub maxsus immunoglobulinlar miqdori aniqlanadi. Bu tahlil kichik yoshdagi bolalarda teri sinamalarini o‘tkazish imkoni bo‘lmaganda yoki ular man etilgan hollarda qo‘llaniladi. Bundan tashqari, u og‘ir allergik reaksiyalarga chalingan bolalar uchun xavfsizdir. Tahlil natijalariga ko‘ra, allergenlarning qaysi guruhlariga sezuvchanlik mavjudligini aniqlash mumkin, biroq afsuski, reaksiya aynan ularga bo‘lganligini ishonchli tarzda tasdiqlash imkonsiz. Shuningdek, IgE ning umumiy darajasi boshqa holatlarda ham ko‘tarilishi mumkin. Shu sababli, tekshiruv zarurati va uning natijalari faqat mutaxassis tomonidan klinik manzara bilan birgalikda aniqlanishi va talqin qilinishi lozim.

Provokatsion sinamalar

Bu eng aniq tashxis usuli bo‘lib, maxsus klinikada qat’iy shifokor nazorati ostida o‘tkaziladi. Bemorga taxmin qilingan allergenning (masalan, oziq-ovqat yoki dori-darmonning) minimal dozalari beriladi va organizmning javob reaksiyasi baholanadi. Agar oldingi usullar aniq natija bermagan bo‘lsa, ushbu test qo‘llaniladi. Provokatsion sinamalar juda ehtiyotkorlikni talab etadi, chunki ular kuchli allergik reaksiyani keltirib chiqarishi, hatto anafilaksiyaga olib kelishi mumkin. Joyida zudlik bilan tibbiy yordam ko‘rsatish imkoniyati mavjud bo‘lishi muhim hisoblanadi. 

Ushbu usullarning har biri o‘ziga xos ko‘rsatmalar va cheklovlarga ega. Shifokor bolaning yoshi, alomatlarning xususiyati va taxmin qilingan allergik modda asosida tegishli tashxislash usulini tanlaydi. Allergiyani o‘z vaqtida va aniq aniqlash samarali davolash hamda oldini olish rejasini ishlab chiqish imkonini beradi.

MUHIM! Ushbu testlarning barcha natijalari bir xil emas va mutaxassis tomonidan to‘g‘ri talqin qilinishini talab etadi. Ularni mustaqil ravishda "tayinlash"ning umuman foydasi yo‘q! Test natijasi har doim ham klinik ahamiyatga ega bo‘lgan allergen aniqlanganini anglatmaydi. Shu sababli, tahlil natijalari doimo bemordagi alomatlar va kasallik tarixi bilan birgalikda baholanadi. Tashxisni tasdiqlash uchun qanday tekshiruvlar zarurligini faqat shifokorning o‘zi aniqlay oladi.

Allergiya - bu sinov, ammo hukm emas. Eng muhimi, bolani diqqat bilan kuzatib borish, mutaxassislarga murojaat etish va ularning tavsiyalariga rioya qilishdir.